Foireann

Míċeál Ó Loċlainn

Londanach is ea Míċeál, a chuir fé i ndúthaigh Mhúsgraí Uí Fhloínn, Contae Chorcaí. Chaith sé roinnt mhaith de bhlianaibh ag obair i dtionscail na ríomhaireachta mar innealtóir chrua-earra ⁊ mar riarthóir córas i Sasana ⁊ in Éirinn. Mar Fheidhmeannach Ríomhaireachta, in Acadamh na hOllscolaíochta Gaeilge, Ollscoil na hÉireann, Gaillimh, atá sé ag obair ó 2003 i leith ⁊ is in Áras Shorcha Ní Ghuairim, ionad de chuid an Acadaimh i Ruisín na Maithníoch, a bhíonn sé ag obair go príomhúil.

An chartlannaíocht dhigiteach, logánú chomhéadan úsáideora ríomhairí i dtímpeallachtaí líonra agus forbairt chóracha beaga ríomhaireachta don Ghaelainn ⁊ do theangacha Ceilteacha eile an dá iomaire is mó atá aige á dtreabhadh le roinnt de bhlianaibh. Is air atá dualgais theicniúla Chartlanna Joe Éinniú agus do chúm sé roinnt sainbhreiseán WordPress mar chuid den obair seo. Is é a réitigh an tsraith eisiuintí nua a cuireadh leis na Cartlanna i mbliain a 2019 chun cothrom céid Joe a cheiliúradh. Ta áiseanna aige forbartha chun teanga chomheadain ghrafaigh Windows is Ubuntu Linux a riaradh. I ngort FreeBSD atá sé ag saothrú fé láthair.

Tá sé ag réiteach léirithe leictreonaigh d’An Músgraigheach don nGréasán do réir a chéile agus d’úsáid córacha a d’fhorbair sé don acmhainn sin san obair seo.

R-phost: micheadbrul.maclochlainn@oeglbhkpoiaillimh.ie

Róisín Nic Dhonncha

Is as An Aird Thiar i gceantar Charna, Contae na Gaillimhe, do Róisín. In Iorras Aithneach atá an baile seo, thart ar shé mhíle siar an bóthar as Ruisín na Maithníoch, mar ar rugadh Sorcha Ní Ghuairim. Is léachtóir le Gaeilge í Róisín, i gColáiste Mhuire gan Smál, Luimneach.

Tá léann an chultúir, gnéithe den bhéaloideas agus an prós comhaimseartha i measc na réimsí spéise atá ag Róisín. Is í an amhránaíocht ar an sean-nós a príomhréimse taighde agus tá sí tar éis díriú go háirithe ar oidhreacht na hamhránaíochta sin ina ceantar dúchais. Tá suim faoi leith aici i stádas agus i seachadadh na n‑amhrán, agus i dtuiscintí ar an aeistéitic i measc amhránaithe agus éisteoirí araon. Tá roinnt alt agus aistí foilsithe i nGaeilge agus i mBéarla aici ar na hábhair sin.

Is ceoltóir aitheanta freisin í agus bíonn sí ag múineadh an cheoil thraidisiúnta ar an bhfeadóg stáin agus an fheadóg mhór.

R-phost: rowcekoisin.nicdhonn57icha@mic.usbwl.ie